Tindfjallajökull & Tindfjöll

Tindfjöll eru fjallaröð með mörgum tindum og heitir sá mesti þeirra einfaldlega Tindur (1251 m.y.s.) og dregur fjallgarðurinn nafn sitt af honum. Þó að Tindfjallajökull sé með minnstu jöklum landsins er hann á risastórum gíg, u.þ.b. 7-10 kílómetrar að þvermáli, sem hefur myndast við mikið sprengigos. Ýmir er hæstur 1462 metra hár og Ýma er 1448 metrar. Ýma er aðeins austar en Ýmir, en þessir tveir tindar eru samstofna tindar með skarð á milli. Útsýni er mjög gott af þessum tindum yfir á Mýrdalsjökul, Eyjafjallajökul, Þórsmörk, Markafljótsgljúfur og Fjallabak svo eitthvað sé nefnt.

Tindfjallajökull er ellefti stærsti jökull landsins og því með þeim minnstu, og þekur um 13 km2. Jökulþykktin er ekki þekkt, en áætluð að vera á milli 50-100 metrar, og jökulís getur aðeins myndast á litlu svæði í jöklinum. Áætlað er að eldstöðin Tindfjallajökull sé um 700.000 ára gömul en eldvirkni á svæðinu gæti þó hafa hafist fyrir um 1-2 milljónum ára. Um 35-40 km2 askja er í Tindfjöllum sem er um 5 km í þvermál. Askjan og Tindfjöll eru að mestu gerð úr basísku og súru móbergi, hraunlögum og innskotum. Margir tindar eru í Tindfjöllum og eru fjöllin nefnd eftir tindinum Tindur (1251 m), en hæstu tindar Tindfjalla eru þó Ýmir (1462 m) og Ýma (1448 m). Ekki eru þekkt gos úr kerfinu á sögulegum tíma, en þó er talið að eldstöðin hafi gosið allt að tólf sinnum síðan seint á síðasta kuldaskeiði ísaldar og er kerfið enn talið virkt.