Landbrotshólar

Landbrotshólar eru víðáttumesta gervigígasvæði á Íslandi og mynduðust í Eldgjárgosinu árið 939. Gervigígar geta myndast þegar hraun rennur yfir votlendi. Þegar 1100°C heitt hraun kemst í snertingu við vatn verða miklar sprengingar þar sem vatnið nánast hvellsýður.

Við það tætist hraun og gjóska upp í loftið og miklir hólar og gígar hlaðast upp sem nefnast gervigígar. Í dag eru flestir gígarnir mosa og grasi vaxnir og mynda gullfallegt hólalandslag sem skemmtilegt er að ganga um. Gönguleið liggur í gegnum svæðið sem hægt er að nálgast ókeypis á Wappinu (https://wapp.is).