Kvernugil Canyon
Kvernufoss
Kvernugil er um það bil 500 m austan við Byggðasafnið í Skógum og er falleg gönguleið inn gilið og að hinum 40 m háa Kvernufossi sem fellur þar niður af bjargbrúninni.
Gangan inn gilið að fossinum tekur um 20 mínútur og er nýlagður göngustígur í gilinu. Margar jarðmyndanir sjást úr gilinu og má þar m.a. sjá fallegt stuðlaberg, kubbaberg og lagskipt móberg. Kvernugil byrjaði líklega að myndast við lok síðasta jökulskeiðs og hefur áin grafið sig niður í jarðlagastaflann síðan þá. Um gilið rennur áin Kverna, eða Kvernhólsá, sem er bergvatnsá með upptök á Skógaheiði og rennur í Skógá um 2,1 km neðan við Kvernufoss.
Kvernufoss er einkar fagur foss og er einn af fáum fossum á Íslandi sem hægt er að ganga á bak við. Bak við fossinn er bergið laust í sér og oft sleipt þar, og ætti því fólk að fara varlega þegar farið er þar um.
