Hatta

Hatta er stórglæsilegt móbergsfjall, eða tindur kannski frekar, og er í vesturbrún Víkurheiðar.

Hatta er um 504-512 m að hæð og því hæsta fjallið við Vík og er útsýnið af því stórfenglegt. Fjallið er væntanlega tiltölulega ungt á jarðfræðiskala, líklega myndað á síðasta eða næstsíðasta hlýskeiði ísaldar, og er, eins og flest ef ekki öll fjöll í Mýrdalshreppi, hluti af íslensku móbergsmynduninni og myndað innan eldstöðvakerfi Kötlu.

Efst í Höttu sjálfri má sjá mjög fallega lagskipt móberg og þá er þar einnig töluvert af brotabergi (þursabergi) að finna. Neðri hluti fjallsins er hins vegar að mestu leyti hulinn urðarbrekkum, skriðum og grónu landi. Hatta er nokkuð jökulsorfin og er hugsanlegt að tindurinn sjálfur hafi verið lítið jökulsker sem stóð upp úr hinum hörfandi ísaldarjökli. 

Skemmtileg gönguleið er upp á fjallið, en ekki fyrir alla þar sem það getur verið ansi bratt upp.