Fagrifoss

Fagrifoss er foss í Geirlandsá. Fossinn er mjög fagur, og ber því nafn með rentu, og fellur niður í tilkomumikið gljúfur sem áin hefur grafið á síðustu árþúsundum.

Gljúfrinu svipar nokkuð til Fjaðrárgljúfurs og eru gljúfraveggirnir að mestu úr móbergi, en tilkomumiklir gangar skera það af og til. Lítið bílastæði er austan við fossinn og liggur göngustígur að útsýnispalli við fossinn.

Gott er að hafa í huga að gróður þarna er viðkvæmur og aðstæður við fossinn og gljúfrið oft varasamar, og því er æskilegt að halda sig á stígnum og á útsýnispallinum. Þá er fossinn á leiðinni að Lakagígum og því ekki á allra færi að heimsækja, þar sem aka þarf yfir nokkur vöð á leiðinni og vegurinn getur einnig verið erfiður, og er því aðeins fær vel útbúnum jeppum.