Drangurinn í Drangshlíð

Þjóðsagan segir að Grettir Ásmundarson hafi verið að sýna krafta sína og hrundið dranginum í Drangshlíð úr Hrútafelli og eftir standi skarðið sem er fyrir ofan Skarðshlíð.

Drangurinn er hins vegar að öllum líkindum gamall sjávardrangur og er að mestu leyti úr móbergi, en ekki er ólíklegt að sá hluti drangsins sem nú er hulinn jarðvegi sé úr basalti. 

Drangurinn er nokkuð rofinn og við það hafa myndast hellar og skútar. Þeir hafa verið notaðir undir útihús og árið 1928 voru t.d. fjós, 4 hlöður, fjárhellir, 3 hesthús og þurrkhellir í Drangnum.

Í dag standa enn nokkur hús og eru góð dæmi um eldri útihús og byggingar.