Þórólfsfell og Mögugilshellir

Fjallið Þórólfsfell er við sunnanverð Tindfjöll. Þórólfsfell er móbergsstapi og nær hæst upp í 570 metra hæð yfir sjávarmáli en fjallið sjálft er um 450 metra hátt. Þórólfsfell myndaðist líklega í eldgosi við lok síðasta jökulskeiðs, fyrir meira en 11.500 árum. Það eru jökulrákir efst á stapanum og því hefur hann myndast áður en kuldaskeiðinu lauk.

Þórólfsfell hefur hins vegar aðeins öðruvísi myndunarsögu en flestir stapar, en er þó talinn sem stapi. Gosið sem myndaði Þórólfsfell var gos undir jökli, en talið er að hallinn á berginu undir eldstöðvunum, sem er um 12°, hafi leitt til þess að bráðvatnið úr jöklinum hafi ekki byggst upp við eldstöðvarnar heldur flætt í burtu jafnóðum, og þar af leiðandi varð ekki sprengigos heldur hraungos.

Þórólfsfell er því að mestu leyti byggt upp af hraunlögum, ekki móbergi, en er með sama útlit og stapi. Þórólfsfell er ekki eini stapinn sem myndast hefur þannig, en Bláfell, sem er í grennd við Þórólfsfell, myndaðist á sama máta. 

Þórólfsfell er 574 m hár móbergsstapi innst í Fljótshlíðinni og er útsýni af toppi þess stórfenglegt en þaðan sést á þrjá jökla. Tindfjallajökul, Eyjafjallajökul og Mýrdalsjökul. Þórólfur Asksson nam þar land samkvæmt Landnámu og mun hafa verið þar bæjarstæði til forna. Sunnan við Þórólfsfell er Mögugil en þar eru miklar móbergsmyndanir, gengið er undir stórgrýti og í gegnum hella. Neðarlega í gilinu er að finna dropahellinn Mögugilshelli sem er mikið náttúrufyrirbrigði. Hellirinn er í blágrýtisæð, um 15 metra langur og hefur myndast vegna gasbólu eða loftþrýstings. Hann er þakinn blágrýtistaumum og innarlega í honum eru svo einhvers konar gúlar (um 0,5 m að þvermáli), allt kolsvart og gljáandi. Eggert Ólafsson segir í ferðabók sinni að Mögugilshellir sé einstakur á Íslandi, jafnvel í heiminum.