Lómagnúpur

Lómagnúpur rís hátt yfir landsvæðinu í kring við Núpsvötn, með Skeiðarársand fyrir framan sig, með vestari hluta Vatnajökuls sér að baki og Skeiðarárjökul sér til hliðar. Hæst nær Lómagnúpur upp í 764 metra en fremsti hluti fjallsins, sem nefnist Lómagnúpsnef, er í 671 metra hæð.

Lómagnúpur er hluti af stærri fjallgarði sem nefnist Björninn, en sú eldstöð eða eldstöðvar sem byggðu hann upp eru ekki virk lengur. Neðstu jarðlögin í Lómagnúpi eru um 2.5 milljón ára gömul en þau efstu um 1 milljón ára. Lómagnúpur var því að mestu leyti byggður upp af eldgosum undir jöklum ísaldar, þar sem þykk móbergs- og kubbabergslög hlóðust upp á kuldaskeiðum á meðan hraun rann á hlýskeiðum, og er jarðlagastaflinn einkar fallegur fremst í fjallinu.

Mörg berghlaup hafa fallið úr Lómagnúpi og kom stærsta þekkta berghlaupið úr vestanverðu fjallinu. Það er talið hafa fallið í júlímánuði árið 1789 og kallast Hlaupið.