Laufskálavarða

Laufskálavarða er hraunhryggur milli Hólmsár og Skálmar, við þjóðveginn norðan byggðar í Álftaveri. Stærsti hryggurinn er um 48x20 metrar að stærð og eru minni stakir klettar austan við hann. Á og í kringum hrygginn má sjá fjöldann allan af litlum vörðum, en sagan segir að hver sá sem fór í fyrsta sinn um Mýrdalssand skyldi hlaða vörðu sér til fararheilla, en uppruni þessa siðs er þó ekki þekktur né af hverju hann hófst.

Ómögulegt er að aldursgreina vörðurnar, en margar af þeim hafa verið hlaðnar á seinni tímum. Mýrdalssandur var erfiður yfirferðar, mikið af sandbleytu, óbrúaðar ár og auðvelt að villast, og því er líklegt að siðurinn hafi komist á í von um að auka líkurnar á því að komast heill heim aftur. Laufskálavarða dregur nafn sitt af bænum Laufskálum, en bærinn á að hafa staðið þar í grennd en tekið af í Kötluhlaupi um 980. Staðsetning bæjarins er þó ekki þekkt og við fornleifaskráningu svæðisins fundust engin ummerki um hann. Nú hefur verið reist lítið útsýnishús við Laufskálavörðu og er glæsilegt útsýni þaðan til allra átta.