Eyjarhóll og Pétursey

Pétursey er 275 metra hár móbergsstapi, myndaður í gosi undir jökli og/eða í sjó. Bergið hefur verið aldursgreint í Pétursey og myndaðist fyrir um 113 þúsund árum, við lok síðasta hlýskeiðs eða við upphaf síðasta jökulskeiðs. Sunnan við Pétursey er Eyjarhóll, sem er keilulaga grasi gróinn hóll.

Hóllinn hefur myndast vegna rofs á Pétursey og hefur líklega verið drangur þegar afstæð sjávarstaða var hærri við lok síðasta jökulskeiðs, en lækkun sjávarstöðu og framburður jökulánna hefur valdið því að Pétursey er nú langt inn í landi. Pétursey var upphaflega kölluð Eyjan há, en var síðar breytt og telja sumir að Pétursnafnið sé til heiðurs Péturs postula, en þó gæti það hafa komið annarsstaðar frá. Jörðin Pétursey var kirkjujörð, en missir prestsskylduna á 13. eða 14. öld yfir til Sólheima.

Hægt er að ganga upp á Pétursey, en óstikaður slóði liggur frá réttinni vestan megin við fjallið og upp suðvestan megin, og er útsýnið þaðan mjög gott. Þá er Eyjahellir nálægt slóðanum og gaman er að kíkja þangað inn.