Valáfangar í Víkurskóla

Katla jarðvangur hefur séð um kennslu á valáföngum í Víkurskóla undanfarin misseri samhliða þess að sjá um rannsóknarverkefni nemenda í Víkurfjöru þar sem nemendur mæla fimm snið í Víkurfjöru. Verkefnið í Víkurfjöru hefur verið í gangi síðan janúar 2021, en nemendur mæla sniðin fjórum sinnum á ári og má sjá niðurstöður mælinga þeirra hér (https://www.katlageopark.is/um-kotlu/rannsoknir/vikurfjoruverkefnid/).

Samhliða því hefur jarðvangurinn boðið upp á valáfanga á haustönn í Víkurskóla, en þar fá nemendur tækifæri til að læra enn meira um fjörur og hvað stýrir breytingum á þeim. Þá var einnig valáfangi á vorönninni, en þá rannsökuðu nemendur landbrot við austanverðan Dyrhólaós, bæði með því að mæla núverandi staðsetningu á rofabörðum við ósinn og kortleggja breytingar á honum út frá eldri loftmyndum. Þá flugu nemendur dróna til að taka myndir af ósnum sem verður hægt að nota í framtíðinni til að kortleggja breytingar á ósnum. Katla jarðvangurinn vill þakka bæði Víkurskóla og nemendum hans fyrir ánægjulegt samstarf í valáföngunum.