Víkurfjara

Hin fagra Víkurfjara fyrir framan Vík er að mestu sandfjara en getur haft töluvert af möl í sér, sérstaklega yfir háveturinn. Sandurinn er auðvitað svartur og að mestu kominn frá Kötlu.

Fjaran er nokkuð ung, en talið er að sandfjaran hafi farið að myndast við Víkurkletta á 17. öld vegna jökulhlaupa frá Kötlu. Á áratugunum eftir gosið 1918 óx Víkurfjara mikið og náði um 500-600 m lengra til suðurs en í dag. Í kringum árið 1970 snerist þróunin síðan við og byrjaði fjaran að hopa og um 1990 var farið að hafa áhyggjur af hversu nálægt fjaran væri komin við þorpið.

Til að verja þorpið var byggður flóðvarnargarður árið 1995, og er skemmtilegur göngustígur ofan á honum í dag, og síðan tveir sandfangarar árið 2012 og 2017. Síðan sandfangararnir voru byggðir er fjaran við þá nokkuð stöðug og jafnvel færst fram. Austan við sandfangarana hefur landbrotið hins vegar haldið áfram og gengur oft mikið á þegar aldan skellur þar á fjörukambinum.