Dyrhólaey

Dyrhólaey er móbergsstapi sem hefur myndast í gosi í sjó, líklega á síðasta hlýskeiði ísaldarinnar. Eyjan er að mestu úr móbergi en einnig er að finna þar hraunlög og innskot.

Síðan Dyrhólaey myndaðist hafa roföflin unnið vel á henni og við það hafa myndast þau fjölmörgu sker og drangar sem eru við eyjuna ásamt þverhnípta standberginu. Drangarnir eru úr harðara bergi sem stenst roföflin betur og standa því nú einir í sjónum sem vitnisburður um fyrri stærð eyjunnar. Dyrhólaey er þó þekktust fyrir gatklettinn fallega í tanganum sem skagar út frá eynni og gefur henni nafn sitt. Gatkletturinn hefur myndast vegna rofs, og hefur annar minni gatklettur myndast fyrir aftan þann stærri.

Á endanum mun bergið yfir gatinu hrynja og nýr drangur mun þá verða til. Dyrhólaey skiptist í Lágey og Háey og er skemmtileg gönguleið á milli beggja hluta eyjunnar. Útsýnið er mjög fallegt þaðan og þá má einnig sjá lunda og aðrar fuglategundir þar yfir sumartímann.  Í Dyrhólaey er mikilvægt fuglavarp og hefur svæðið verið friðað síðan 1978.