Dverghamrar

Dverghamrar eru fagurlega formaðir stuðlabergshamrar úr blágrýti skammt austan við Kirkjubæjarklaustur. Hamrarnir eru að mestu huldir gróðri en hægt er að ganga niður fyrir þá í gegnum litla opnu og þegar er komið niður fyrir hamrana þá blasir stuðlabergið við.

Skörp skil eru í hömrunum sem líta út eins og skil á á milli tveggja hraunlaga, en hamrarnir eru sama hraunlagið þar sem lagið fyrir ofan er kubbaberg sem myndaðist vegna óreglulegrar kólnunar vegna vatns, líklega bráðvatns frá jökli sem lá yfir gosstöðvunum, á meðan stuðlabergið myndaðist í þeim hluta hraunsins sem ekki varð fyrir áhrifum frá vatni. Stuðlaberg myndast vegna samdráttar í kólnandi basaltbráð þannig að bergið dregst saman og klofnar í stuðla sem oft eru sexstrendir, en geta þó verið þrí- til tólf-hyrndir.

Stuðlar standa ávallt hornrétt á kólnunarflötinn, þ.e.a.s. beinast í þá átt sem kólnunin kemur úr, og því lóðréttir í þessu tilviki. Dverghamrar hafa orðið fyrir miklu rofi, þar sem jökul- og öldurof hafa rofið jarðlagastaflann ofan af hraunlaginu, en yngri og gullfallegar móbergsmyndanir má sjá í Fossnúpinum rétt norðan við Dverghamra.