07. júlí 2018

Undur yfir Dundu. Ný bók um frásagnir af Kötlugosum 1625-1860.

Katla Jarðvangur hefur gefið út bókina Undur yfir dundu, en í henni eru frásagnir af Kötlugosum á árunum 1625–1860. Már Jónsson bjó til prentunar.

 

"...Fuglar loftsins smáir og stórir misstu sína rétta og eiginlega raust, flug og burði. Þeir væluðu og emjuðu álíka og þá ein kvalin manneskja svo sem í dauðans hættu og fári lengi hrekst eður stödd vera kann. Þeir þorðu og ekki heldur upp í loftið að fljúga vegna þeirra hljóða og eldgangs er í loftinu voru, heldur með sinni emjan og sorgarkvaki skriðu eða flöktu með jörðunni, álíka og þá fuglaungar fyrst flug læra...."

Með slíku orðalagi lýsti Þorsteinn Magnússon áhrifum Kötlugoss í september 1625. Mögnuð frásögn hans er gefin út í þessari bók í tveimur gerðum og er önnur þeirra áður óútgefin.

Einnig eru í bókinni frásagnir sjónarvotta um næstu fimm eldgos í einni stærstu og mikilvirkustu eldstöð á Íslandi og ógurleg jökulhlaup sem fylgdu. Þessi gos urðu árin 1660, 1721, 1755, 1823 og 1860.

Meðal höfunda eru séra Jón Steingrímsson, sem kom fyrst í Mýrdalinn á fyrstu dögum gossins 1755, og Sveinn Pálsson læknir sem fylgdist grannt með gosinu 1823.

Í inngangi fjallar Már Jónsson, prófessor í sagnfræði við Háskóla Íslands, um gosin, höfundana og ritsmíðarnar, jafnframt því sem hann gerir grein fyrir handritum sem voru notuð við útgáfuna. Hægt er að hlýða á viðtal við Má Jónsson um bókina í morgunútvarpinu á Útvarpi Sögu sem fór fram 7. júní síðastliðinn með Markúsi Þórhallsyni og Jóhanni Kristjánssyni.

Hægt er að fara inn á þessa slóð og velja "Morgunútvarpið 2-hluti 7.júní" eða hlusta á það í nýjum flipa hér

Katla Jarðvangur gefur bókina út í tilefni þess að 100 ár eru liðin frá síðasta eldgosi í Kötlu - sem hófst 12. október 1918. Áhugasamir um bókina til kaupa eða endursölu mega endilega senda póst á info@katlageopark.is fyrir nánari upplýsingar. 

Bestu kveðjur,
Starfsfólk Kötlu Jarðvangs!

Twitter Facebook
Til baka